АҚШ ғалымдары бактериялық целлюлозадан пластикке балама бола алатын, жоғары беріктігі бар экологиялық материал әзірледі. Жаңа материалдың беріктігі кейбір металдар мен шыныдан кем түспейді, ал иілгіштігі мен мөлдірлігі оны күнделікті қолданысқа ыңғайлы етеді, деп жариялады Nature Communications журналы.
Хьюстон университеті мен Райс университетінің ғалымдары бактериялық целлюлозаның табиғи қасиеттерін жетілдіру арқылы оның беріктігін күрт арттырған. Целлюлозаны түзетін бактериялар әдетте талшықтарды бейберекет қалыптастырады, бұл олардың физикалық қасиеттерін шектейді. Алайда зерттеушілер арнайы биореактор ойлап тауып, бактериялардың қозғалысын бір бағытта реттей отырып, талшықтардың құрылымын нақты бағытқа бағдарлаған. Нәтижесінде, алынған биоматериалдың созылу беріктігі 436 мегапаскальға дейін жеткен. Бұған қоса, бор нитриді наноқабаттарын қосу арқылы материалдың беріктігі 553 мегапаскальға дейін ұлғайып, жылу өткізгіштігі үш есе жақсарған.
Зерттеу жетекшісі Мухаммед Максуд Рахман:
«Біз жасаған целлюлозалық парақтар жеңіл, берік және экологиялық тұрғыдан қауіпсіз. Олар болашақта пластиктің орнына құрылыс, буып-түю, киім өндірісі, электроника мен энергия сақтау салаларында кеңінен қолданылуы мүмкін», — дейді.
Жетекші автор, докторант М.А.С.Р. Саади бұл үдерісті былай сипаттайды:
«Бактерияларды белгілі бір бағытта қозғалып, біркелкі талшықтар түзуге «үйреттік». Бұл материалдың құрылымы мен қасиеттерін бір уақытта басқаруға мүмкіндік береді.»
Ғалымдар бұл жаңалықты жасыл технологиялардың келесі кезеңі деп бағалап отыр. Себебі целлюлозалық материалдар табиғи жолмен ыдырайды және пластиктен бөлінетін улы қосылыстарды (мысалы, BPA және фталаттар) таратпайды.