Университеттің зерттеушілері сұлы дәніндегі май түзілуінің биологиялық механизмін анықтап, бұл жаңалық болашақта сұлыны өңдеу тиімділігін арттыруы мүмкін екенін мәлімдеді. Оңтүстік Австралия университеті, SARDI және Аделаида университетінің ғалымдары майдың түзілуіне жауапты негізгі ферменттер мен ақуыздарды протеомика және липидомика әдістері арқылы зерттеп, май синтезінің нақты жолдарын анықтады.
Австралия – әлемдегі ең ірі сұлы экспорттаушы елдердің бірі. Алайда сұлы дәніндегі майдың мөлшері жоғары болғандықтан, оны ұнтақтау және қайта өңдеу кезінде қиындықтар туындап жатады. Бұл әсіресе сұлы ұны мен өсімдік ақуыздарына сұраныс артқан кезде өзекті бола түседі. Зерттеу нәтижелері сұлының төмен майлы табиғи сұрыптарын өсіру арқылы майды азайтып, өңдеуді жеңілдетуге жол ашатынын көрсетті. Жаңа сұрыптар тек ауылшаруашылық өнімділікті арттырып қоймай, азық-түлік және балама ақуыз өндірісі үшін жаңа мүмкіндіктер туғызады. Жетекші зерттеуші Даррен Лау қазіргі майды бөліп алу әдістері – қымбат әрі күрделі екенін, сондықтан генетикалық сұрыптау арқылы табиғи түрде төмен майлы сұлы алу – экономикалық жағынан тиімді шешім екенін атап өтті. Ал SARDI жобасының жетекшісі Джанин Крозер бұл зерттеу сұлы майының синтезімен байланысты негізгі биологиялық жолдарды нақтылап бергенін айтты. Бұл жаңалық өсімдік тағамдарына сұраныс артып отырған заманда Австралияны сұлы индустриясындағы жаһандық инновация көшбасшысына айналдыруы мүмкін.