Халықаралық астрономдар тобы Күн жүйесінің шеткі аймағынан жаңа транснептундық нысан — 2020 VN40 атты денені анықтады. Бұл объект Нептунмен ерекше орбиталық резонанста: ол Күнді бір рет айналып шыққанда, Нептун 10 рет айналады. Бұл — мұндай қозғалысқа ие алғаш тіркелген нысан, деп хабарлайды Harvard–Smithsonian Astrophysics Center.
Ғалымдар бұл нысанның ерекше орбиталық қозғалысы мен Нептунмен синхрондылығы Сыртқы Күн жүйесінің қалай қалыптасқанын түсінуге үлкен үлес қосатынын назарға алды. 2020 VN40 нысаны Жерден 140 есе алыс қашықтықта, жоғары еңкеюмен қозғалатын орбитада орналасқан. Оның қозғалысы кәдімгі резонанстық нысандардан ерекше: ол Күнге жақын болған кезде, Нептун да жақын орналасады. Бірақ бұл визуалды ұқсастық — шын мәнінде кеңістікте олар бір-бірінен алыс, себебі 2020 VN40 Күн жүйесінің жазықтығынан төмен орналасқан.
Зерттеу Large inclination Distant Objects (LiDO) жобасы аясында жүргізілген. Нысандарды анықтау үшін Канада-Франция-Гавайи телескопы, Gemini және Magellan Baade обсерваториялары пайдаланылды. Бұл жоба Сыртқы Күн жүйесіндегі жоғары еңкейген орбиталарды зерттеуге бағытталған. Ғалымдар алдағы уақытта Vera C. Rubin обсерваториясы сынды жаңа телескоптар көмегімен осы сияқты ондаған құпия нысанды анықтаймыз деп үміттенеді. Бұл зерттеулер Күн жүйесінің ерте тарихына жаңа деректер ашады.