Жаңа зерттеу нәтижелері көрсеткендей, қара шайды, жидектерді, цитрусты жемістер мен алмаларды жиі тұтыну салауатты қартаюға ықпал етуі мүмкін. Бұл зерттеу Эдит Коуэн университеті, Белфасттағы Куинс университеті және Гарвард университетінің Т.Х. Чан атындағы Қоғамдық денсаулық сақтау мектебінің ғалымдары тарапынан жүргізілген. Ғалымдар флавоноидтарға бай тағамдардың денсаулыққа зиянды қартаюдың негізгі факторларының – әлсіздік, физикалық функциялардың төмендеуі және психикалық денсаулықтың нашарлауы – қаупін азайтуы мүмкін екенін анықтады.
Медицина ғылымының басты мақсаты – адамдардың тек ұзақ өмір сүруі ғана емес, сонымен қатар оларды мүмкіндігінше ұзақ уақыт бойы дені сау күйінде сақтау, — дейді ECU адъюнкт-преподавателі, доктор Никола Бондонно.
Бұған дейінгі зерттеулер көрсеткендей, флавоноидтарды көп тұтынатын адамдар әдетте ұзақ өмір сүреді әрі оларда деменция, диабет немесе жүрек аурулары сияқты созылмалы аурулардың пайда болу қаупі төмен болады. Біздің зерттеуіміз де флавоноидтарға бай тағамдарды көп тұтынатын адамдардың қартаю үдерісі әлдеқайда жақсы өтетінін көрсетіп отыр. 24 жыл бойы жиналған мәліметтерге негізделген бұл зерттеуге 62 743 әйел және 23 687 ер адам қатысты. Нәтижесінде, флавоноидтарды ең көп тұтынған әйелдерде әлсіздік даму қаупі 15%-ға, физикалық функциялардың бұзылуы 12%-ға, ал психикалық денсаулықтың нашарлауы 12%-ға төмен болғаны анықталды. Ер адамдарда бұл көрсеткіштер аздау болса да, флавоноидтарды көбірек тұтыну психикалық денсаулықтың нашарлау қаупінің төмендеуімен байланысты болды.
Флавоноидтар ағзадағы тотығу стрессі мен қабынуды азайтып, қан тамырларының саулығын қолдайды әрі бұлшықет массасының сақталуына көмектеседі. Мұның барлығы қартайғанда әлсіздік пен физикалық функциялардың төмендеуінің алдын алып, психикалық денсаулықты сақтау үшін маңызды, — дейді зерттеу авторларының бірі, профессор Эйдин Кэссиди.
Ол сондай-ақ флавоноидтарға бай өнімдерді – жидектер, алмалар, қызыл шарап, апельсин және шай – үнемі тұтыну қартаю үдерісін салауатты етіп, әлсіздік пен психикалық күйзелістердің алдын алуға көмектесетінін атап өтті. Әйелдер арасында анық байқалған әсер ерлерге қарағанда күштірек болғанымен, бұл айырмашылық зерттеу топтарындағы бақылау мерзімінің ұзақтығына байланысты болуы мүмкін. Нағыз гендерлік ерекшеліктер қазіргі зерттеулерде толық зерттелмеген.
Біз үш порцияға дейін флавоноидтарға бай тағамдарды күнделікті тұтынуды арттырған қатысушылардың арасында әйелдерде барлық үш көрсеткіш бойынша 6–11% төмендеу, ал ерлерде психикалық денсаулықтың нашарлау қаупінің 15%-ға азаюы байқалғанын анықтадық, — дейді Гарвард университетінің профессоры Эрик Римм.
Жалпы, бұл нәтижелер тамақтану дағдыларындағы қарапайым өзгерістердің өмір сапасына оң әсер ететінін және салауатты қартаюды қолдауда үлкен рөл атқара алатынын көрсетеді, — деп қосты ол.